Во 1957 година, група ентузијасти возачи од Кочани изразија желба да формираат организација која во тогашните услови ќе се грижеше за унапредувањето на превентивата и вршење обука во областа на сообраќајот. Покренаа иницијатива пред надлежните органи во Општината и го формираа здружението на возачите и автомеханичарите. За прв претседател беше избран Борис Трендов-Христов. Основната задача на новоформираната организација беше подигање на сообраќајно-техничката култура на повисоко ниво и оквалификувањето на возачите. Беа одржувани стручни предавања и запознавање на членството со правилата и прописите од областа на сообраќајот. Најдобрите резултати се постигнати во текот на 1962 година кога во Кочани со квалификација се стекнаа 120 возачи, а во 1964 уште 84 возачи. Истата година возачкиот испит го положуваат уште 87 кандидати.                                                               По широкиот спектар општествено оправдани и неопходни активности, кои беа резултат на времето во кое се живееше, натешо создавана материјална база и покренување нови акции и манифестации, дојде време да се размислува и за стручните обврски кои исто така во суштина беа подредени на поголемата безбедност на сообраќајот на патиштата. Во 1968 година се започна со организирано вршење на техничките прегледи во кругот на АТС во Кочани (денешен АД Атом-АТС). Таму се работеше во релативно добри услови се до 1978 година кога започна да се гради нова современо опремена станица за технички преглед на моторни и приклучни возила. Пуштена е во употреба во 1981 година. Се до 1970 година сите активности беа поставени на волонтерска основа, а тогаш со вработувањето на контролор за техничка исправност започна времето на значително поквалитетна и целосна услуга на моторизираните кочанчани.

         Посебно внимание во здружението секогаш му беше посветувано на омасовувањето и создавање ново членство. Всушност, тоа беше сватено како основен предуслов за успешни активности. Бројот на членството постојано и без скокови се зголемуваше што е доказ дека и во активностите немало осцилации ... 1973 година е завршена со 1060 членови, 1978 година во организацијата членуваа 2800 членови а во 1987 година се евидентирани над 5000 членови.